مسافرو ته د موجودو پیسو کمښت راغلی، او د خوراکي توکو کمی هم زیات شوی دی. په ځانګړې توګه ناروغې ښځې او ماشومان له دې ستونزې ډېر اغېزمن شوي دي. د طبي مرستې نه شتون له امله د ګڼو ناروغانو وضعیت خراب شوی، او هغه ناروغان چې عملیات شوي، د سختو دردونو سره مخ دي.

ښځې له سختو ستونزو سره مخ دي

د پولې پر سر د اسانتیاوو نشتوالی ښځو ته تر ټولو زیاتې ستونزې پیدا کړې دي. په سختې ګرمۍ او یخنۍ کې د سرپناه پرته انتظار کول د دوی لپاره ستر ازمیښت دی. په ځانګړي ډول هغه ښځې چې یوازې سفر کوي، یا یې نارینه ملګري نه لري، له سختو کړاوونو سره مخ دي.

ځینې ښځې چې میړه یا نور خپلوان یې د افغانستان لور ته د تورخم پولې ته انتظار باسي، دوی له خپلو ماشومانو سره د پاکستان لوري ته له سختو ستونزو سره مخ دي. سړه هوا، د اسانتیاوو نشتوالی، او اوږد انتظار د دوی اندېښنې لا پسې زیاتې کړې دي.

اوس چې د ژمي موسم ر، کوچني ماشومان له ډېرو سختو ستونزو سره مخ دي. د یخنۍ له امله، د مناسب لباس او آرام ځای نه شتون دوی ناروغ کړي، او میندې یې له جدي اندېښنو سره مخ دي. په دې حالت کې د عاجلو اقداماتو اړتیا ده، څو ښځو او ماشومانو ته اساسي اسانتیاوې برابرې شي.

متاثر شویو مسافرو له چارواکو غوښتي چې د انساني همدردۍ پر بنسټ دې تورخم پوله خلاصه شي، څو ناروغان، ښځې، ماشومان او بې وسه مسافر له لا ډېرو ستونزو څخه وژغورل شي.

سرحدي ترینګلتیاوې او د حالاتو خرابېدل

سرچینې وایي تېره شپه د افغان او پاکستاني سرحدي ځواکونو ترمنځ حالات ترینګلي شول. راپورونه ښیي چې طالبان ځواکونو هڅه کوله چې د سرحدي سیمې په اوږدو کې نوې امنیتي پوسته جوړه کړي، خو پاکستاني ځواکونو یې مخالفت وکړ او کار یې ودرولو. د دې پېښې وروسته، د پولې پر سر وضعیت لا ډېر ترینګلی شو.

د تورخم پولې بندېدو نه یوازې مسافر له ستونزو سره مخ کړي، بلکې تجارتي فعالیتونه یې هم بشپړ ځنډولي دي. سوداګرو ته میلیونه روپۍ زیان اوښتی، او د مالونو ډک لارۍ دواړو غاړو ته بندې ولاړې دي.