د ګارډین ورځپاڼې راپور ورکړی چې طالبانو امر کړی ټولې د ښځو ښکلاخونې چې له رسمي بندیز وروسته هم په پټه فعالیت کوي، باید وموندل شي او وتړل شي.

هبت‌الله اخندزاده، د طالبانو مشر، د عاشقانه شعرونو ویلو او په شعرونو کې د نجونو او هلکانو د توصیف منع کړې او خبرداری یې ورکړی چې سرغړونکي به مجازات شي.

ریچارد بېنت، د افغانستان د بشري حقونو په برخه کې د ملګرو ملتونو ځانګړي راپور ورکوونکي، د افغان کډوالو د شړلو د دوام په اړه اندېښنه ښودلې او د دې لړۍ د درولو غوښتنه یې کړې ده.

سیمه‌ییزو سرچینو په هرات ښار کې رسنیو ته ویلي چې د طالبانو د امر بالمعروف او نهی عن المنکر مامورین د شنبې په سهار (د وږي ۸) پر څو خصوصي ښوونیزو مرکزونو یرغل کړی او نجونې یې په زور له صنفونو ایستلې دي.