ښايي تر ټولو دروند شی چې یو افغان کډوال یې له ځان سره وړي، نه پاسپورټ وي، نه ویزه او نه هم هغه بکس چې له وطنه یې راوړی وي. تر ټولو دروند بار، افغان‌والی دی.

زه هم د طالبانو د لومړۍ واکمنۍ پر مهال په کندز کې له زده‌کړو محرومه شوم. هغه وخت مې په کورنیو ښوونځیو او د ملا په حضور کې خپلو زده‌کړو ته دوام ورکړ. له ټولو ستونزو سره سره، هېڅکله مې خپله هیله له لاسه ورنه کړه.

څلور کاله له هغه وخته تېرېږي چې جمهوري نظام ونړېد او طالبان يو ځل بيا واک ته ورسېدل؛ څلور کاله چې هره ورځ يې د دوکې، ناپوهۍ او تاوتريخوالي ياد تازه کوي. ذبيح‌الله مجاهد، د طالبانو وياند، په خپل وروستي مرکه کې له «اسکای نيوز» سره ادعا کړې چې دا ډله له «د مشروعيت له ستونزې» سره نه ده مخ، او ګڼ هېوادونه په «غيرعلني ډول» هغوی منلي دي.