لږ تر لږه شپږ امیندوارې ښځې په کونړ ولایت کې د زلزلې د شاک له امله د وخت نه مخکې د زیږون وروسته د ښځینه ډاکترانو د کمي له کبله مړې شوې دي. سیمه‌ییزې سرچینې وايي یو شمېر نورو ښځو هم خپل نوي زېږېدلي ماشومان له لاسه ورکړي دي.

ریچارد بنت، د ملګرو ملتونو د بشري حقونو شورا ځانګړي راپور ورکوونکي د افغانستان په چارو کې، له پاکستانه غوښتي چې د افغانستان د ختیځې مرګونې زلزلې په تړاو دې د افغان کډوالو د ایستلو بهیر ودروي.

د کاناډا د ماشومانو د ساتنې سازمان اعلان کړی چې د کونړ او ننګرهار په ولایتونو کې د مرګونې زلزلې له امله لږ تر لږه ۱۵ زره ماشومان زیانمن شوي دي. دغه سازمان همداراز ویلي چې درې زره کورنۍ په ختیځو ولایتونو کې اغېزمنې شوې دي.

حمدالله فطرت، د طالبانو د ویاند مرستیال، نن سه‌شنبه (د وږي ۱۱مه) په یوه پیغام کې په ټولنیزه شبکه ایکس کې اعلان کړی چې د کونړ د مرګونې زلزلې د قربانیانو شمېر لا هم په زیاتېدو دی.