استرالیا د لومړي ځل لپاره یوه ښځه د اردو قوماندې ته وټاکله
- Zan News
- 14 hours ago
- 1 min read
د استرالیا حکومت اعلان کړی چې جنرال سوزان کویل د دې هېواد د اردو د نوې قوماندانې په توګه ټاکل شوې ده؛ دا اقدام هغه لومړنۍ ښځه ګرځوي چې د استرالیا د وسلهوالو ځواکونو د یوې اصلي څانګې مشري پر غاړه اخلي.
د استرالیا د لومړي وزیر د دفتر د اعلامیې له مخې، دا ټاکنه د دوشنبې په ورځ، د اپرېل (۱۳مه) تأیید شوې ده.
د استرالیا لومړي وزیر آنتوني آلبانېزي له دې پرېکړې هرکلی کړی او د اردو د پخواني قوماندان سیمون استوارت له خدمتونو یې مننه کړې ده.
د استرالیا د دفاع وزیر ریچارد مارلز دا پېښه «د وسلهوالو ځواکونو په چوکاټ کې د ښځو لپاره تاریخي شېبه» بللې ده.
په اعلامیه کې راغلي چې کویل له ۱۹۸۷ کال راهیسې د استرالیا له پوځ سره یوځای شوې او په بېلابېلو نظامي برخو کې یې دندې ترسره کړې دي.
هغه په دې بنسټ کې له تجربه لرونکو څېرو څخه ګڼل کېږي.
دا په داسې حال کې ده چې اوس مهال ښځې د استرالیا د دفاعي ځواکونو شاوخوا ۱۹ تر ۲۱ سلنه جوړوي او په وروستیو کلونو کې د مشرتابه په کچه د هغوی حضور زیات شوی دی.
