امسو: یوازې ۶،۹ سلنه ښځینه خبریالانې په افغانستان کې فعالې دي

Image: AFP

د افغانستان د رسنیو د ملاتړ سازمان (AMSO) په یوه تازه راپور کې خبرداری ورکړی چې د طالبانو تر واکمنۍ لاندې د ښځینه خبریالانو وضعیت په خورا بحراني حالت کې دی.

د دې راپور موندنې ښيي چې یوازې ۶،۹ سلنه ښځینه خبریالانې توانېدلي په رسنیو کې کار ته دوام ورکړي، په داسې حال کې چې ډېرې یې اړې شوې په پټه کار وکړي او له دوو پنځمې زیاتې بیا په بشپړه توګه له مسلک څخه لاس په سر شوې دي.

دغه راپور چې نن دوشنبه (۳۱ وږی) د ۱۰۱ ښځینه خبریالانو له سروې وروسته د ۲۰۲۵ د جولای او اګست په میاشتو کې خپور شوی، څرګندوي چې ډېری خبریالانې له پراخ سانسور، شخصي ګواښونو، د جنسیتي محدودیتونو او د تجهیزاتو له کموالي سره مخ دي. له ۹۰ سلنې زیاتې اړې شوې خپل راپورونه بدل یا حذف کړي او ۵۴ سلنه یې خپلې دندې له لاسه ورکړې دي.

د AMSO په وینا، ډېرې ښځې د خپل مسلکي هویت د ساتلو لپاره له کوره په پټه کار کوي یا د فریلنسر په توګه فعالیت کوي، خو دا لارې یې له سرچینو، همکارانو او تجهیزاتو ته لاسرسی خورا محدود کړی دی. په همدې حال کې، نږدې نیمایي ځواب ویونکو ویلي هیله نه لري چې په راتلونکي کال کې خپلې دندې ته دوام ورکړي.

راپور همدارنګه ښيي چې له ۸۰ سلنې زیاتې خبریالانې په تېر یو کال کې له هېڅ ډول ملاتړ څخه برخمنې نه شوې. AMSO ټینګار کوي چې د دې وضعیت دوام کېدای شي د ښځو غږ په رسنیو کې په بشپړه توګه خاموش کړي.

دغه نهاد له نړیوالې ټولنې بېړني ملاتړ غوښتی او ټینګار یې کړی چې د ښځینه خبریالانو تاب‌آوري د ورځني مقاومت څرګندونه ده، خو پرته له نړیوالې همغږۍ او اقدام، په رسنیزه صحنه کې د دوی د بشپړ حذف خطر جدي دی.

یاد راپور په داسې حال کې خپرېږي چې له هغه مهاله چې طالبان په اګست ۲۰۲۱ کې بیا واک ته رسېدلي، د ښځینه خبریالانو وضعیت د هېواد د رسنیو د تاریخ یو له تیارو پړاوونو څخه ګرځېدلی دی. طالبانو د سختو محدودیتونو په لګولو ښځې له رسنیو څخه عملاً حذف کړي دي.