انتونیو ګوترش: د افغانستان د زلزله ځپلو لپاره موجودې سرچينې بسنه نه کوي
- Zan News
- Sep 3
- 1 min read
انتونیو ګوترش، د ملګرو ملتونو سرمنشي، د افغانستان د ختيځ د زلزله د ژوندي پاتې شویو لپاره د عاجلو او زياتو مرستو غوښتنه کړې او ټينګار يې کړی چې موجودې سرچينې د اړتياوو د پوره کولو لپاره کافي نه دي.
ګوټرش په يوه اعلاميه کې چې د يوناما له خوا خپره شوې، ويلي ملګري ملتونه به د افغان ولس د مرستې لپاره هېڅ هڅه ونه سپموي او له نړيوالې ټولنې يې غوښتي چې د دې فاجعې د عاجلې ځواب ويلو لپاره زياتې بشردوستانه سرچينې ځانګړې کړي.
د دې اعلاميې له مخې، تر اوسه ۵ ميليونه ډالر د ملګرو ملتونو د بیړني صندوق (CERF) او ۵ ميليونه ډالر نور د افغانستان د بشردوستانه صندوق څخه د عاجلو مرستو لپاره ځانګړي شوي دي.
د ملګرو ملتونو سرمنشي د قربانيانو کورنيو ته د خواخوږۍ په څرګندولو او د ټپيانو د روغتيا دعا کولو سره ويلي، چې ملګري ملتونه او د هغوی شریکان د اړتياوو د چټک ارزونې، د بیړنيو مرستو د لېږد او د زياتو ملاتړونو د بسيج کولو په حال کې دي.
دا په داسې حال کې ده چې د شپې لهخوا د يکشنبې په ورځ د ۶ ريښتره زلزله د کونړ، ننګرهار، لغمان او نورستان ولايتونه ولړزول. طالبانو ويلي، تر اوسه لږ تر لږه ۱۴۱۱ کسان وژل شوي او له درې زره زيات کسان ټپيان شوي دي.
