ایران په تېر يوه مياشت کې ۱۰ افغانان، په شمول د يوې ښځې، اعدام کړي دي

د بشري حقونو سازمان «هه‌نگاو» اعلان کړی چې ايران د روان ميلادي کال د سپتمبر په مياشت کې لږ تر لږه ۱۸۷ بنديان اعدام کړي چې په هغوی کې ۱۰ افغانان، د يوې ښځې په ګډون، شامل دي.

دغه بنسټ د چهارشنبې په ورځ (د اکتوبر لومړۍ) راپور ورکړی چې د ايران د اعدامونو شمېر د تېر کال د سپتمبر په پرتله ۱۴۰ سلنه زيات شوی او د وروستيو شلو کلونو تر ټولو لوړې کچې ته رسېدلی دی. ډېری اعدام شوي کسان د نشه يي موادو او عمدي قتل په تور محکوم شوي وو، خو په منځ کې درې سياسي فعالان، دوه مذهبي بنديان او لږ تر لږه شپږ ښځې هم شته.

دا په داسې حال کې ده چې يوازې په تېرو اته مياشتو کې لږ تر لږه ۴۶ افغانان په ايران کې اعدام شوي دي. په تازه راپور کې د يوه افغانې ښځې، هديقه آبادي، نوم هم ياد شوی چې د نشه يي موادو په تور اعدام شوې ده.

طالبانو له وړاندې د ايران له قضايي چارواکو غوښتنه کړې وه چې د اعدام شويو افغانانو لپاره بديلې سزاوې په پام کې ونيسي، خو ښکاري چې دغه غوښتنه له پامه غورځول شوې ده.