د آزادی او اندېښنې د ښځو بنسټ: په پنجشیر کې د برقع اجباري کول د طالبانو سختو تګلارو دوام دی

Photo: 8am newspaper

د آزادی او اندېښنې د ښځو بنسټ په یوه اعلامیه کې ویلي چې د تګ راتګ محدودول او د ښځو لپاره د برقع اجباري کول په پنجشیر ولایت کې د طالبانو سختو تګلارو دوام دی او دغه کړنې د دیني ارزښتونو او نړیوالو ژمنو سره په ټکر کې دي.

په دې اعلامیه کې راغلي چې طالبان په داسې تګلارو سره نه یوازې د ټولنې د نیمې برخې کرامت او ازادي سلبوي، بلکې د هېواد ټولنیز، کلتوري او اقتصادي راتلونکی هم له منځه وړي.

دغه بنسټ له هغو سازمانونو او بنسټونو څخه چې د بشري حقونو ملاتړ کوي غوښتي چې پر طالبانو فشار زیات کړي او د بشري حقونو د نقض پېښې په افغانستان کې ثبت او مستند کړي.

دا په داسې حال کې ده چې مخکې داسې راپورونه خپاره شوي وو چې د ښځو پر تګ راتګ سخت محدودیتونه او د برقع اجباري کول په پنجشیر کې پلي شوي دي. د ملګرو ملتونو د مرستندویه پلاوي په درې میاشتني راپور کې چې پرون خپور شو، ویل شوي چې طالبانو د خپلې خوښې د حجاب د رعایت په برخه کې پر ښځو فشارونه زیات کړي دي.