د افغانستان د جمهورپالو ښځو شبکې: د برقعې جبري کول د اسلامي ارزښتونو او د انسانی کرامت ښکاره نقض دی

Image: Javed Tanveer/AFP

د هرات په ولایت کې د ښځو لپاره د برقعې د جبري کولو له پریکړې وروسته، د افغانستان د جمهورپالو ښځو شبکې په یوه اعلامیه کې دا پرېکړه د طالبانو له لوري «د ښځو د بنسټیزو حقونو او د انسانی د کرامت ښکاره نقض» بللې ده.

په اعلامیه کې راغلي، د طالبانو پالیسۍ، لکه جبري حجاب، د زده‌کړې او کار منع، او د ښځو د ټولنیز حضور محدودول، «د اسلامي، انساني او بشري حقونو له ارزښتونو سره په ښکاره تضاد کې دي».

دغه شبکه ټینګار کوي چې ښځه او سړی د انسان په توګه د برابر او نه‌سلبېدونکو حقونو لرونکي دي، او هېڅ ډله حق نه لري چې د دین يا حجاب په نوم د ښځو ازادي او د انتخاب حق محدود کړي.

په اعلامیه کې راغلي: «د ښځو پر وړاندې د ورځ په ورځ زياتېدونکو محدوديتونو پلي کول د طالبانو هغه وېره څرګندوي چې له آګاهو او فعالو ښځو یې لري. طالبان غواړي د ښځو په بند ساتلو سره خپل واک د ناپوهۍ او استبداد پر بنسټ ټينګ وساتي.»

دغه شبکه له د هرات له ښځو غوښتي چې چوپتيا ماته کړي او په سوله‌ييزو او مدني لارو د دې تګلارې پر وړاندې خپل اعتراض څرګند کړي. همدارنګه، له نړيوالو ادارو، رسنيو او د بشري حقونو له مدافعانو غوښتنه شوې چې د طالبانو دا کړنې مستندې کړي او د سياسي او حقوقي فشار له لارې د دې محدوديتونو د بندېدو لپاره اقدام وکړي.

دا اعلاميه په داسې حال کې خپرېږي چې طالبانو په هرات ولایت کې د ښځو لپاره د برقعې اغوستل جبري کړي دي. د راپورونو له مخې، ښځې پرته له برقعې د روغتونونو، دولتي ادارو او ترانسپورتي وسایطو ته د ننوتو اجازه نه لري. په تيرو ورځو کې، يو شمېر ښځو په کابل او هرات کې د دې پرېکړې پر ضد د اعتراض په بڼه برقعې وسوځولې او هغه يې «د ښځو د ځپلو او د ټولنې له ژوند څخه د حذف وسيله» بللې ده.