د افغانستان په شمال کې زلزله؛ لږ تر لږه ۲۰ تنه مړه او له ۳۶۰ زيات ټپيان شوي دي

@PaikAftab/x

د ۶.۳ ريښتر په کچه زلزلې د تېرې شپې (۱۲ لړم) په نيمه شپه د بلخ ولايت د خُلم ولسوالۍ ولړزوله چې له امله يې تر اوسه لږ تر لږه ۲۰ تنه مړه او له ۳۶۰ زيات نور ټپيان شوي دي.

د راپورونو له مخې، زياتره قربانيان د بلخ او سمنګان له ولايتونو څخه دي. دا زلزله د شپې شاوخوا ۱۲:۵۹ بجې د ځمکې په ۳۵ کيلومتره ژوره کې رامنځته شوې وه او د کابل، بغلان، سمنګان، سرپل او کندز په ولايتونو کې هم احساس شوې ده.

ځايي سرچينې وايي، د زلزلې له امله لسګونه کورونه د بلخ په خُلم او شولګره ولسواليو، د سمنګان په حضرت سلطان ولسوالۍ او ايبک ښار، او نږدې ۸۰۰ کورونه د بدخشان د شهر‌بزرګ ولسوالۍ د چوګاني په کلي کې بشپړ يا نيمه ويجاړ شوي دي.

د بلخ د طالبانو ځايي چارواکو ويلي چې شپږ تنه په خُلم او دوه ماشومان په شولګره کې مړه شوي دي. په سمنګان ولايت کې هم له لسو زيات مړي او شاوخوا ۲۶۰ ټپيان ثبت شوي دي.

يوناما او د بشري مرستو د همغږۍ دفتر (اوچا) ويلي چې د مرستې او ارزونې ډلې د پېښې سيمې ته رسېدلې دي، څو د زيانونو ارزونه وکړي او د بېړنيو مرستو رسونه پيل کړي.