د رسنیو د ملاتړ سازمان د طالبانو له لوري په هرات کې د ژوندي موجوداتو د انځورونو د خپرولو بندیز وغنده

GoogleImage

د افغانستان د رسنیو د ملاتړ سازمان (امسو) په یوه اعلامیه کې د طالبانو وروستی اقدام چې په هرات کې یې د ژوندي موجوداتو د انځورونو خپرول منع کړي، «د بیان د ازادۍ او د خلکو د اطلاعاتو ته د لاسرسي ښکاره سرغړونه» بللې او د دې پرېکړې له پایلو یې خبرداری ورکړی دی.

دغه سازمان د چهارشنبې په ورځ (۲ تله) وویل: «دغه اقدام نه یوازې د رسنیو ازادي محدوده کوي، بلکې د هېواد پر رسنیزو، کلتوري او ټولنیزو فعالیتونو هم دروند ګوزار دی.»

امسو ټینګار کړی چې طالبان د داسې محدودیتونو په تپلو سره رسنۍ له دې محروموي چې د اطلاع‌رسونې او پوهاوي ورکولو خپل اساسي رول ترسره کړي، او د ژوندي موجوداتو د انځورونو د خپرولو بندیز هېڅ ډول سازګاري له رسنیزو معیارونو، د مطبوعاتو له ازادۍ او د خلکو له د حقِ پوهېدو سره نه لري. دغه بنسټ زیاته کړې چې د طالبانو دا اقدام د نړیوالو قوانینو او د بشري حقونو له نړیوالو میثاقونو سره په څرګند تضاد کې دی.

دغه سازمان له طالبانو غوښتي چې پر ځای د فشار او سانسور، اجازه ورکړي رسنۍ په ازاد ډول خپلې چارې ترسره کړي. همدارنګه یې له د بیان د ازادۍ د ملاتړ بنسټونو او نړیوالې ټولنې غوښتنه کړې چې د طالبانو پر وړاندې چوپ پاتې نه شي او د افغان رسنیو او خبریالانو د ملاتړ لپاره عملي او جدي ګامونه پورته کړي.

دا په داسې حال کې ده چې د طالبانو د امر بالمعروف او نهی عن المنکر ریاست په هرات کې، پرون د محلي رسنیو له مسئولینو سره په ناسته کې امر وکړ چې د ژوندي موجوداتو، په شمول د انسان، هر ډول انځور خپرول «حرام او ممنوع» دی.