د شنبېارغواني جنبش: طالبان د بګرام په اړه د معاملې حق نه لري
- Zan News
- Sep 23
- 2 min read
د شنبېارغواني جنبش د طالبانو او د امریکا د ولسمشر ډونالډ ټرمپ ترمنځ د وروستیو ترینګلتیاوو په غبرګون کې اعلامیه خپره کړې او ټینګار یې کړی چې د بګرام هوايي اډه د افغانستان د خاورې نهبېلېدونکې برخه ده او هېڅ ناقانونه ډله، په ځانګړي ډول طالبان، د هغې په اړه د پرېکړې حق نه لري.
دغه جنبش د سهشنبې په ورځ (د تله ۱مه) خبرداری ورکړی: «طالبان یوه ترهګره ډله او د بشري حقونو څرګند ناقض دی چې په ناقانونه توګه یې واک غصب کړی او په افغانستان کې یې د جنسیتي آپارتاید رژیم ټینګ کړی دی. دا ډله هېڅ کورنی او نړیوال مشروعیت نه لري او د افغانستان د خلکو استازولي نه شي کولی. له طالبانو سره د بګرام په اړه هر ډول موافقه یا معامله د ترهګرۍ د مشروعیت معنا لري.»
د شنبېارغواني جنبش د امریکا پر سیاستونو هم نیوکه کړې او ویلي یې دي چې د امریکا ولسمشر په داسې حال کې له طالبانو سره معامله کوي چې یوازې د واشنګټن او طالبانو ګټې په پام کې نیول شوې، خو د افغانستان خلک، چې د دې خاورې اصلي خاوندان دي، په بشپړ ډول له پامه غورځول شوي دي.
دغه جنبش ټینګار کړی: «لکه د ننگین دوحې تړون، دا ځل هم د افغانستان د ملت برخلیک د تړلو دروازو تر شا معامله کېږي؛ داسې معامله چې زیانمن او نهجبرانېدونکي پایلې به ولري.»
یاده دې وي چې د بګرام هوايي اډه، چې نږدې دوه لسیزې د امریکايي ځواکونو اصلي مرکز و، له افغانستانه د امریکا تر وتلو وروسته په ۲۰۲۱ کال کې د طالبانو لاس ته ولوېده. د روان میلادي میاشتې له نیمايي راهیسې ډونالډ ټرمپ څو ځله غوښتنه کړې چې دا اډه دې امریکا ته بېرته وسپارل شي او ویلي یې دي که بګرام نه ورسپارل شي، «بدې پېښې» به رامنځته شي.
طالبانو دغه غوښتنه رد کړې او هغه یې د افغانستان د حاکمیت نقض بللی دی. ذبیحالله مجاهد، د طالبانو ویاند ټینګار کړی چې د افغانستان یو متر خاوره به هم ونه سپارل شي او د طالبانو ځواکونه د قوي ځواب او آن د بل ۲۰ کلن جنګ لپاره تیار دي.
خو څو ورځې وروسته طالبانو په یوه نرملحنه اعلامیه کې، د دوحې تړون ته په اشارې سره، څرګنده کړه چې امریکا ژمنه کړې چې د افغانستان پر وړاندې به له زور څخه کار نه اخلي. هغوی زیاته کړه چې طالبان د شرعي اصولو او د متوازنې، اقتصادمحورې بهرنۍ تګلارې پر بنسټ، له ټولو هېوادونو سره د مثبتو اړیکو غوښتونکي دي او واشنګټن باید خپلو ژمنو ته وفادار پاتې شي.
