د طالبانو د استخباراتو رئیس: داعش د کسانو د جذب لپاره له ټلېګرام او ټیکټاک څخه کار اخلي

د طالبانو د استخباراتو عمومي رئیس عبدالحق وثیق ادعا کړې چې داعش ډله د اړیکو ټینګولو، د مالي سرچینو د برابرولو او د تبلیغاتو د خپرولو لپاره له ټلېګرام او ټیکټاک ټولنیزو شبکو څخه کار اخلي.
وثیق دا څرګندونې د «شانګهای پلس» په امنیتي غونډه کې کړې دي، چې د پنجشنبې او جمعې په ورځو د (لړم په ۱۴مه او ۱۵مه) د ازبیکستان په سمرقند ښار کې جوړه شوې وه.
هغه ویلي چې د دغو دوو ټولنیزو شبکو مالک شرکتونه د داعش د فعالیتونو د مخنیوي په برخه کې د طالبانو له حکومت سره همکاري نه کوي.
د طالبانو د استخباراتو عمومي رئیس زیاته کړې چې د ټکنالوژۍ شرکتونو د همکارۍ نشتوالي په نړیواله کچه د داعش د فعالیتونو د پراخېدو زمینه برابره کړې ده.
وثیق همدارنګه له ټکنالوژۍ شرکتونو غوښتي چې د داعش د انلاین فعالیتونو د مخنیوي لپاره د طالبانو له ادارې سره همکاري وکړي.
خو د وثیق په خپرو شویو څرګندونو کې د داعش له خوا د مالي سرچینو د برابرولو لپاره د دغو شبکو د کارولو په اړه مشخص شواهد او له ټلېګرام او ټیکټاک شرکتونو څخه د طالبانو د غوښتنو جزییات نه دي وړاندې شوي.






