د ماشومانو د ژغورنې سازمان: د افغانستان د زلزله‌ځپلو سیمو د ۱۱ زره حامله مېرمنو ژوند له ګواښ سره مخ دی

Photo: AFP

د ماشومانو د ژغورنې سازمان (Save the Children) خبرداری ورکړی چې لږ تر لږه ۱۱ زره حامله مېرمنې د افغانستان په ختیځو زلزله‌ځپلو سیمو کې په خېمو او سختو شرایطو کې ژوند کوي او کېدای شي خپل نوي زېږېدلي ماشومان په همدې موقتي پناهځایونو کې وزېږوي.

دغه نهاد د چهارشنبې په ورځ (۲ تله) په خپاره شوي راپور کې ټینګار کړی چې د ژمي له نږدې کېدو سره د میندو او نویو زېږېدلو ماشومانو ژوند له جدي ګواښ سره مخ کېږي.

د دې سازمان د موندنو پر بنسټ، شاوخوا ۹۰ سلنه زلزله‌ځپلې کورنۍ خپلې استوګنځایونه له لاسه ورکړي او اوس په خېمو یا د باندې ژوند کوي. همدارنګه ۳۹ زره ماشومان په دغو سیمو کې په خلاصه فضا کې او پرته له اړینو امکاناتو پاتې دي.

سمیرا سید رحمان، د ماشومانو د ژغورنې د پروګرامونو مدیر په افغانستان کې، ویلي دي:

«هیڅ ماشوم باید خپله لومړۍ ساه په یوه خېمه کې وانخلي. هیڅ ماشوم باید د ژمي له رارسېدو سره بې له بوټانو، ګرم کالیو او یا د تودوخې وسایلو پاتې نه شي. اوس د وخت پر وړاندې یوه سیالي روانه ده څو د نویو زېږېدلو ماشومانو او ماشومانو ژوند د سخت ژمي له ګواښ څخه وژغورل شي.»

د ماشومانو د ژغورنې سازمان ویلي چې په کنړ ولایت او نورو زیانمنو سیمو کې ګرځنده روغتیايي خدمتونه، نغدي او روغتیایي مرستې، او همدارنګه رواني ـ ټولنیز ملاتړ وړاندې کوي، خو ټینګار یې کړی چې اوسني منابع کافي نه دي او د نړیوالو مرستو بېړنۍ اړتیا موجوده ده.

دا په داسې حال کې ده چې د ۵ ریشتره زلزلې د روان میلادي میاشتې په پیل کې د افغانستان ختیځ ولایتونه، په ځانګړي ډول کنړ، ننګرهار او نورستان ولړزول. په دې پېښه کې له ۲۲۰۰ زیات کسان وژل شوي او زرګونه نور ټپیان شوي دي. زرګونه کورونه وران شوي او د کنړ غرنیو سیمو ته تر ټولو ډېر زیان اوښتی دی.

د ځمکښوېدنې له امله ګڼې لارې تړل شوې او روغتونونو ته لاسرسی ستونزمن شوی دی. د ښځینه ډاکترانو کمښت، د طالبانو له لوري پر ښځینه مرستندویانو محدودیتونه او د روغتیايي وسایلو نشتون د حامله مېرمنو کړکېچ څو چنده کړی دی.

ملګرو ملتونو هم ویلي چې له دې زلزلې وروسته نږدې نیم میلیون وګړي بېړنیو مرستو ته اړتیا لري.