د مقتدرو ښځو جنبش: د افغان نجونو د زدهکړې محرومول د یو ملت راتلونکی خاموشول دي
- Zan News
- Sep 10
- 1 min read
له دې چې طالبانو واکمنۍ ته څلور کاله تېر شوي دي، د نجونو د ښوونځیو دروازې له شپږم ټولګي پورته او همدارنګه پوهنتونونه لا هم تړلي پاتې دي. په دې موده کې، نړیوالو بنسټونو او بېلابېلو هېوادونو څو څو ځله د ښوونځیو او پوهنتونونو د بیا پرانیستو غوښتنه کړې ده، خو طالبانو په دې برخه کې هېڅ عملي ګام نه دی اخیستی.
د افغانستان د مقتدرو ښځو جنبش د نړېوال د سواد د ورځې په مناسبت د یوې اعلامیې په خپرولو سره دا محرومیت غندلی او دا یې د بشري حقونو ښکاره سرغړونه او د یو ملت راتلونکی خاموشول بللي دي. په اعلامیه کې راغلي دي: «یوازینی جرم د افغان نجونو ښځینه توب دی.»
دغه جنبش ټینګار کړی چې طالبان په خپلو تبعیضي تګلارو سره میلیونونه نجونې د زدهکړې له حقه محرومې کړې دي. سواد یوازې لوستل او لیکل نه دي، بلکې د آزادۍ، عدالت او پرمختګ څراغ دی او د هغه خاموشول د افغانستان راتلونکی تیاره کول دي.
د جنبش په وینا، هېڅ ټولنه د باسوادې او آګاهې ښځې پرته نېکمرغۍ او پرمختګ ته نه رسېږي او د نجونو له زدهکړې محرومول افغانستان د تباهۍ لور ته بیايي.
د افغانستان د مقتدرو ښځو جنبش له ملګرو ملتونو، د بشري حقونو له شورا او له نړېوالې ټولنې غوښتي چې د دې سیستماتیک تبعیض پر وړاندې چوپ پاتې نه شي، پر طالبانو فشار راوړي څو ښوونځي او پوهنتونونه د نجونو پر مخ پرانیزي او د افغان نجونو خاموشه شوې غږ په نړیواله کچه انعکاس ومومي.
دغه جنبش په پای کې ټینګار کړی دی: «بې له باسوادې ښځې افغانستان نه ژغورل کېږي او بې له د زدهکړې حقه تلپاتې سوله ناشونې ده.»
