د نجونو بلاګرانو نیول؛ د طالبانو له خوا د ښځو د ځپلو او سانسور نوې فصل
- Ariahn Raya
- Sep 28
- 2 min read
په شخصي ازادیو د تازه ترین برید کې، طالبانو د نجونو بلاګرانو په نیولو سره د فشار، وېرې او پراخ سانسور نوې فصل د افغانستان پر ښځو پرانستی دی.
د ټولنیزو رسنیو د فعالې عالیه ملورین نیول یوازې د یوه آنلاین خفقان د پروژې پیل ښکاري، هغه پروژه چې موخه یې د ښځو غږ په مجازي فضا کې چوپول دي.
محلي سرچینو په هرات کې تأیید کړې چې د عالیه له نیول کېدو وروسته لسګونه نجونې بلاګرې نه یوازې خپل ډیجیټلي فعالیتونه بند کړي، بلکې د ورته برخلیک د وېرې له امله یې د خپلو مینځپانګو ټول آرشیفونه هم حذف کړي دي.
عامه فضا، په ځانګړي ډول د ځوانو نجونو تر منځ، اوس له وېرې او اضطراب څخه ډکه ده.
خاطره جمشیدي، یوه ځوانه بلاګره، زننیوز ته وایي چې اوس د ښځو لپاره په مجازي فضا کې ژوند «ډېر ستونزمن او ساه بندوونکی» شوی دی. هغې زیاته کړه چې حتی د یوې ساده جملې لیکل یا د یوه عادي انځور خپرول هم د نیول کېدو لامل کېدای شي.
فریده خالد، بله نجلۍ بلاګره، څرګنده کړې چې طالبان هېڅکله د ښځو د ازادۍ پر وړاندې خپله مبارزه نه دروي.
هغې خبرداری ورکړی چې دا کړنې د طالبانو د سیستماتیک سیاست یوه برخه ده څو ښځې له ټولنیزو، کلتوري او سیاسي ډګرونو څخه پاک کړي.
په همدې حال کې، مرضیه رامش اوسنی وضعیت د ښځو لپاره له «جهنم» کم نه بولي.
هغې د نړیوالو بشري حقونو له بنسټونو د عاجلې مداخلې غوښتنه کړې او ټینګار یې کړی چې د دې نوې څپې پر وړاندې چوپتیا د یوې ښځهستیزې ډلې له نظام سره د همکارۍ په مانا ده.
سره له دې چې طالبان پرلهپسې د ښځو د حقونو د رعایت ژمنې کوي، خو په عمل کې چې څه تر سترګو کېږي هغه د ښځو د بنسټیزو ازادیو منظم سرکوب دی، ان تر دې چې په ډیجېټل فضا کې هم.
طالبانو نه یوازې ښځې له کار، زدهکړې او د بیان له آزادۍ محرومې کړي دي، بلکې اوس په هدفمند ډول هڅه کوي چې د هغوی ساه اخیستل په مجازي نړۍ کې هم بند کړي.
دا کړنې په داسې حال کې ترسره کېږي چې نړیواله ټولنه لا هم د دې جنایتونو چوپه ننداره کوي.
