د پاکستان او طالبانو ترمنځ د نښتو زیاتوالی؛ د پاکستان په بریدونو کې څلور ملکي وګړي وژل شوي
د طالبانو ویاند ذبیحالله مجاهد ویلي چې د کندهار، پکتیا او خوست پر ولایتونو د پاکستان په وروستیو بریدونو کې څلور ملکي وګړي وژل شوي دي. خو د پاکستان حکومت د افغانستان پر ۱۰ ځایونو د بریدونو د تایید ترڅنګ ادعا کړې چې یوازې نظامي هدفونه یې په نښه کړي دي.
مجاهد د پنجشنبې په ورځ د (سپټمبر په ۲۴مه) د دغو بریدونو په غبرګون کې هغوی غندلي او ویلي یې دي چې د پاکستاني ځواکونو دا اقدام د افغانستان د حاکمیت نقض دی. هغه خبرداری ورکړی چې د دا ډول بریدونو تکرار به د افغانستان د خلکو غوسه راوپاروي او د پاکستان د پوځ لپاره به ناوړه پایلې ولري.
دغو بریدونو د چهارشنبې په ماښام او د پنجشنبې په سهار د کندهار، پکتیا او خوست ځینې سیمې په نښه کړې دي.
په همدې حال کې، د پاکستان د اطلاعاتو وزیر عطاالله تارر ویلي چې د دغه هېواد هوایي بریدونه د افغانستان له خاورې د پاکستان هوایي حریم ته د بېپیلوټه الوتکو د ننوتلو په غبرګون کې ترسره شوي دي.
هغه ادعا کړې چې پاکستاني ځواکونو د چهارشنبې په ورځ دغه بېپیلوټه الوتکې پېژندلې او خپلو هدفونو ته تر رسېدو مخکې یې شنډې کړې دي.
د تارر په وینا، پاکستان وروسته هغه ۱۰ ځایونه په نښه کړل چې د هغه د ادعا له مخې، د دغو بېپیلوټه الوتکو د ساتلو او توغولو لپاره کارول کېدل.
د پاکستان د اطلاعاتو وزیر دغه بریدونه «دقیق، سنجول شوي او متناسب» بللي او ویلي یې دي چې یوازې د بېپیلوټه الوتکو له بریدونو سره تړلي نظامي مرکزونه یې په نښه کړي دي. هغه همدارنګه خبرداری ورکړی چې که طالبان یو ځل بیا پاروونکي اقدامات وکړي، پاکستان به قاطع ځواب ورکړي.
خو طالبانو د افغانستان له خاورې د بېپیلوټه الوتکو د توغولو په اړه د پاکستان ادعا رد کړې ده.
د پاکستان تازه بریدونه په داسې حال کې ترسره شوي چې دغه هېواد یوازې درې ورځې وړاندې د کونړ او پکتیکا ځینې سیمې هم بمبار کړې وې.
په افغانستان کې د ملګرو ملتونو مرستندویه پلاوي (یوناما) تایید کړې چې د سپټمبر د ۲۱مې په بریدونو کې په کونړ کې لږ تر لږه درې ملکي وګړي، چې یو نارینه، یوه ښځه او یوه نجلۍ پکې شامل دي، وژل شوي او څلور نور ټپیان شوي دي.
