د ښځو لپاره د ملګرو ملتونو اداره: د شمال د زلزلې له ښځينه قربانيانو سره د مرستې لپاره ښځينه مرستندويان استول شوي دي

Photo: AFP

د افغانستان لپاره د ښځو د ملګرو ملتونو اداره ويلي چې د دوشنبې شپې د زورورې زلزلې له رامنځته کېدو وروسته، د دې ادارې ښځينه مرستندوي ډلې له خپلو محلي همکارانو سره يو ځای د شمال زلزله‌ځپلو سيمو ته استول شوې دي، څو له ښځو او نجونو سره د ارزونې او مرستې چارې ترسره کړي.

دغه اداره نن (۱۳ لړم) په يو پيغام کې ليکلي دي: «موږ د خپلو محلي همکارانو په همغږۍ د ښځو او نجونو بېړنۍ اړتياوې ارزونه کوو او له افغان ښځينه مرستندويانو ملاتړ کوو، څو هر څومره ژر چې ممکنه وي، د اغېزمنو کسانو لاسنيوی وکړي.»

د يادونې وړ ده چې د ۶.۳ ريښتر په کچه زلزلې د دوشنبې په شپه (۱۲ لړم) د بلخ ولايت د خُلم ولسوالۍ ولړزوله، چې تر اوسه لږ تر لږه ۲۰ تنه د بلخ او سمنګان په ولايتونو کې مړه او له ۹۴۰ زيات ټپيان شوي دي.

په دې زلزله کې سلګونه کورونه د خُلم، شولګرې، حضرت سلطان او د مزارشريف او ايبک ښارونو په ځينو برخو کې نړېدلي او ښځې او ماشومان د قربانيانو په منځ کې دي.

دا پېښه يوازې څو وخت وروسته له هغې رامنځته شوې، چې د افغانستان ختيځې سيمې د يوې بلې مرګونې زلزلې شاهدې وې، چې له امله يې له دوه زرو زيات کسان مړه شوي وو.