ذکيه خدادادي د اروپا د شورا «شمال–جنوب» جايزه ترلاسه کړه
- Zan News
- Oct 30
- 1 min read
ذکيه خدادادي، د پاراتکواندو افغان لوبغاړې او د پارالمپيک د کډوالو د ټيم غړې، د اروپا د شورا معتبره «شمال–جنوب» جايزه ترلاسه کړې ده.
دا جايزه د چهارشنبې په ورځ (۷ لړم) د پرتګال د پارلمان په رسمي مراسمو کې د دغه هېواد ولسمشر هغې ته ورکړه.
ذکيه خدادادي په يو پيغام کې ويلي، دا د هغې د ژوند له تر ټولو ځانګړو او نههېرېدونکو ورځو څخه ده: «دا يوازې يو جايزه نه ده، بلکې د اميد، مقاومت او پر خوبونو د باور نښه ده، د هغو ټولو خلکو لپاره چې له سترو خنډونو سره سره نه تسليمېږي.»
دغه افغان ورزشکاره، چې له ۲۰۲۱ کال وروسته له افغانستان وتلې او اوس په فرانسه کې ژوند کوي، دا جايزه د افغانستان ټولو ښځو، کډوالو او هغو ورزشکارانو ته ډالۍ کړې چې د يو روښانه راتلونکي لپاره هڅه کوي.
ذکيه خدادادي په پاريس ۲۰۲۴ پارالمپيک سياليو کې د ټيکواندو په برخه کې د کډوالو د ټيم لپاره لومړۍ مډال وګاټه، دا برونزي مډال نهيوازې د دې ټيم، بلکې د ټولو مبارزو افغان نجونو لپاره د الهام سرچينه وبلل شوه.
هغې په خپله وينا کې وويل: «زه ټولو ښځو ته، په افغانستان او نورو هېوادونو کې، وايم، اميد ژوندی دی، تاسې يوازې نه ياست. ورزش د سولې، ازادۍ او انساني کرامت نړيواله ژبه ده. زړور اوسئ او د ښه راتلونکي لپاره مبارزه وکړئ.»
د «شمال–جنوب» جايزه د اروپا د شورا لهخوا له ۱۹۹۵ کال راهيسې هغو کسانو ته ورکول کېږي چې د بشري حقونو، برابري او د ملتونو ترمنځ د فرهنګي خبرو اترو د پياوړتيا لپاره هڅې کوي.
