روزا اوتونبایوا: د نجونو د ښوونځیو د څلور کلنې بندیز دوام یو نسل د نابودۍ له ګواښ سره مخ کړی دی
- Zan News
- Sep 18
- 2 min read
روزا اوتونبایوا، د ملګرو ملتونو د سرمنشي ځانګړې استازې د افغانستان په چارو کې، د امنیت شورا په ناسته کې خبرداری ورکړی چې د طالبانو تګلارې د ښځو او نجونو پر وړاندې هېواد له «ستر ټولنیز او اقتصادي بحران» سره مخامخ کړی دی.
نوموړې د چهارشنبې په ورځ (۲۶ وږی) په دې ناسته کې د نجونو د ښوونځیو څلور کلن بند ته په اشارې وویل: «یو نسل د نابودۍ له ګواښ سره مخ دی، داسې نسل چې اوږدمهاله لګښتونه به د هېواد پر اوږو واچوي او په افغان ټولنه کې به پراخې اندېښنې او ناهیلي را منځته کړي.»
د هغې په وینا، دا محرومیت نه یوازې میلیونونه افغان نجونې له زدهکړې او راتلونکي بېبرخې کړي، بلکې هر کال د افغانستان اقتصاد ته له ۱.۴ میلیارد ډالرو زیات زیان رسوي.
دغه د ملګرو ملتونو لوړپوړې چارواکې ټینګار وکړ چې د افغانستان د خلکو اکثریت هم د نجونو د زدهکړو د بندیز مخالف دي. د ملګرو ملتونو د ښځو د یوې نوې نظرپوښتنې له مخې، له ۸۰ سلنې ډېر افغانان د نجونو د ښوونځیو د بیا پرانیستلو غوښتونکي دي.
اوتونبایوا زیاته کړه چې د طالبانو تګلارې د ښځو پر وړاندې، لکه د لوړو زدهکړو بندیز او د ښځو د کار منع په مرستندویه ادارو او آن په ملګرو ملتونو کې، د نړیوالې ټولنې د مرستو وړتیا فلج کړې ده.
هغې وویل: «په همدې وروستیو کې، د طالبانو د دفاع وزارت ځواکونو د افغان ښځینه کارکوونکو د ملګرو ملتونو دفترونو ته د ننوتلو مخه ونیوله. همدارنګه، د طالبانو د کورنیو چارو وزارت پرسونل د ملګرو ملتونو د ساحوي دفترونو ته د ښځینه کارکوونکو لاسرسی په بېلابېلو ولایتونو کې بند کړی دی. دا محدودیت د ملګرو ملتونو وړتیا د افغانانو د مرستې لپاره په داسې مهال کې ګډوډ کړی چې خلکو تر بل هر وخت زیاتې مرستې ته اړتیا لري.»
دا په داسې حال کې ده چې نړیوالې ټولنې څو ځل دا تګلارې «د جنسیتي اپارتاید» بللي او د هغې د ژر تر ژره لغوه کولو غوښتنه یې کړې ده. سره له دې، طالبان لا هم پر دغو محدودیتونو ټینګار کوي.
