ریچارد بنت: د نجونو د زدهکړې بندیز په افغانستان کې «افراطګرايي» ده
- Zan News
- Sep 27
- 1 min read
ریچارد بنت، د ملګرو ملتونو د بشري حقونو ځانګړي راپور ورکوونکي په افغانستان کې، خبرداری ورکړی چې د طالبانو له لوري پر ښځو او نجونو د زدهکړې بندیز د «افراطګرايي» مصداق دی او د افغانستان راتلونکی له نابودۍ سره مخامخوي.
نوموړي د جمعې په ورځ (۴ تله) په نیویارک کې د ملګرو ملتونو د عمومي اسمبلۍ په یوه اړخیزه غونډه کې وویل چې د طالبانو تمرکز پر مذهبي تلقین، پر ځای د رسمي زدهکړې، د افغانستان ځوان نسل له فرصتونو او هیلې بېبرخې کوي.
بنت ټینګار وکړ چې د افغانستان د وضعیت مستند راپورونه د نړیوالو بحثونو د جوړولو او اغېزمنو نړیوالو اقداماتو لپاره حیاتي دي. هغه همدارنګه پر دې ټینګار وکړ چې باید داسې بسترونه رامنځته شي چې د افغانانو غږونه، په ځانګړي ډول د علماوو او اسلامي کارپوهانو، واورېدل شي، ځکه د هغوی لیدلوري د طالبانو د روایتونو پر وړاندې مهم رول لري.
د ملګرو ملتونو ځانګړي راپور ورکوونکي د مدني ټولنې د ځپلو، د منتقدانو د ډارولو او د طالبانو له خوا د مخالفانو د غچ اخیستنې غندنه وکړه او ویې ویل: «سره له دې چې طالبان د مخالفو غږونو د چوپولو لپاره فشارونه زیات کړي، د دې ډلې کړنې لا هم د نړیوالې ټولنې تر ذرهبین لاندې دي.»
دغه څرګندونې په داسې حال کې کېږي چې طالبان د ۲۰۲۱ کال د اګست له بیا واکمنېدو راهیسې د بیان ازادي او مدني فعالیتونه په کلکه محدود کړي دي. ګڼ شمېر راپورونه چې د بیان د ازادۍ نقض، د مدني اعتراضونو ځپل او د خپلواکو بنسټونو محدودول ښيي، په نړیواله کچه جدي اندېښنې راولاړې کړې دي.
