ریچارد بنت: پاکستان دې د افغان کډوالو ایستل د زلزلې په اوج کې ودرول شي
- Zan News
- Sep 2
- 1 min read
ریچارد بنت، د ملګرو ملتونو د بشري حقونو شورا ځانګړي راپور ورکوونکي د افغانستان په چارو کې، له پاکستانه غوښتي چې د افغانستان د ختیځې مرګونې زلزلې په تړاو دې د افغان کډوالو د ایستلو بهیر ودروي.
هغه د سهشنبې په ورځ (د وږي ۱۱مه) په ټولنیزه شبکه ایکس کې په یوه پیغام کې لیکلي: «زه له پاکستانه غواړم چې لږ تر لږه د افغانانو د ایستلو پلان شوې پروګرامونه ځنډني کړي او خپل تمرکز د دې سیمې پر بشردوستانه هڅو وکړي.»
بنت ټینګار کړی: «دغه کار به د یوه دلسوزه ګاونډي نښه وي او اوس یو بیړنی اولویت دی.»
دغه غوښتنه په داسې حال کې مطرح کېږي چې دوه ورځې وړاندې د افغان کډوالو د وتلو لپاره ټاکل شوې مهلت پای ته ورسېد. د طالبانو د کډوالو چارو د کمېسیون د شمېرو له مخې، یوازې پرون له ۱۱ زره ډېر کسان د پاکستان له پولو او نږدې ۵ زره نور د ایران له لارې افغانستان ته ستانه شوي دي.
ملګرو ملتونو ویلي چې یوازې په روان میلادي کال کې له ۲.۳ میلیونو زیات افغان کډوال له پاکستان او ایران افغانستان ته ستانه شوي دي. دغه بحران په داسې حال کې روان دی چې افغانستان د ختیځ د زلزلې له فاجعې سره یوځای د نوې بېکورهکېدو او بشري اړتیاوو له څپې سره مخ دی.
