طالبانو په اوو ولایتونو کې د ۳۳ ښځو د کورنیو ستونزو د حل خبر ورکړ
د طالبانو د امر بالمعروف او نهی عن المنکر وزارت اعلان کړی چې د دغه وزارت محتسبانو په تېرو دوو ورځو کې د افغانستان په اوو ولایتونو کې د ۳۳ ښځو کورنیو شکایتونو ته رسېدنه کړې ده.
دغه وزارت د یکشنبې په ورځ د (لړم په ۳مه) په یوه اعلامیه کې ویلي چې دا شکایتونه په کونړ، تخار، فراه، پکتیا، بلخ، سرپل او زابل ولایتونو کې ثبت شوي دي.
د دغه وزارت په وینا، د طالبانو محتسبانو په ولایتي ریاستونو کې د شکایتونو له ثبتولو وروسته د ښکېلو لورو خبرې اورېدلې او د اسلامي شریعت له نظره یې د ښځې او مېړه د حقونو او مسؤلیتونو په اړه سپارښتنې کړې دي.
دغه وزارت ادعا کړې چې د دې اقداماتو په پایله کې د ۳۳ ښځو پر وړاندې د کورني تاوتریخوالي او ناوړه چلند د دوام مخه نیول شوې او د خبرو اترو، مشورو او پخلاینې له لارې د شخړو د حل زمینه برابره شوې ده.
خو د طالبانو د امر بالمعروف وزارت د شکایتونو د ډول، د هرې قضیې د څېړلو د څرنګوالي او د یادو ښځو د اوسني وضعیت په اړه نور جزییات نه دي ورکړي.
دا هم نه ده روښانه چې د دغو ښځو د خوندیتوب او د کورني تاوتریخوالي د بیا تکرار د مخنیوي لپاره کوم ملاتړي اقدامات یا ځانګړي میکانیزمونه په پام کې نیول شوي دي که نه.
