طالبانو په هرات کې يوه ښځينه ډاکټره د حجاب د نه مراعتولو له امله نيولې ده
- Zan News
- Oct 6
- 1 min read
سيمهييزې سرچينې په هرات ولايت کې وايي چې د طالبانو د امر بالمعروف او نهي عن المنکر ځواکونو د جمعې په ورځ (۱۱ تله) يوه ښځينه ډاکټره د د حجاب د نه مراعتولو له امله د هرات ښار د ۶۴ متري سړک له سيمې نيولې ده.
د يادې ډاکټرې يوه نږدې سرچينه، چې د امنيتي دلايلو له امله نهغواړي نوم يې څرګند شي، زننيوز ته ويلي:
«د امر بالمعروف او نهي عن المنکر مامورينو لومړی له هغې وپوښتل چې ولې د هغې د وېښتانو يوه برخه ښکاري. ډاکټرې ځواب ورکړ چې دا موضوع له تاسو سره هېڅ تړاو نه لري. طالبان له سيمې ووتل، خو نيم ساعت وروسته له رينجر موټر سره بېرته راستانه شول او هغه يې ونيوله. دا مهال په زندان کې ده.»
دغه پېښه په داسې حال کې رامنځته شوې چې طالبانو په دې وروستيو کې د ښځو پر ضد د خپلو محدودوونکو تګلارو په دوام، يو شمېر ښځينه بلاګرې، مدني فعالانې او نورې ښځې چې په ټولنيزو او مسلکي برخو کې فعاله وې، نيولي دي.
د بشري حقونو فعالان وايي، د طالبانو دا ډول کړنې د يوې منظمې برنامې برخه ده چې موخه يې د ښځو له عامه فضا څخه سيستماتيک حذف او د هغوی د ټولنيز حضور غلی کول دي.
