طالبانو په کابل کې د یوې معترضې ښځې ورور نیولی دی

شمایل توانا ناصري، د «د افغانستان د ښځو د عدالت او ازادۍ د خوځښت» مسؤله، وايي چې ورور یې محمد ناصري د طالبانو د استخباراتو له خوا نیول شوی او کورنۍ یې تر اوسه د هغه د برخلیک په اړه هېڅ معلومات نه لري.

اغلې ناصري رسنیو ته ویلي چې ورور یې تېره اوونۍ د شنبې په ورځ (۱۸ زمری) د کابل د لوېدیځ په دشت برچي سیمه کې نیول شوی او تر اوسه هېڅ ډول تماس او یا د ساتلو ځای نښه نه ده ترلاسه کړې.

دغه د ښځو د حقونو فعاله څلور ورځې وړاندې په ټولنیزو شبکو کې د خپل ورور د ورکېدو خبر ورکړی و او له کورنیو او نړیوالو مسؤلو بنسټونو یې غوښتي وو چې د هغه د موندلو او برخلیک د روښانه کولو لپاره همکاري وکړي.

طالبانو تر اوسه په دې اړه هېڅ غبرګون نه دی څرګند کړی.

دا په داسې حال کې ده چې طالبانو له واک ته د بېرته رسېدو وروسته، څو ځله معترضې ښځې او د هغوی خپلوان نیولي او بندیان کړي دي. دغه کړنې د فشار او وېرو د یوې پالیسۍ برخه بلل کېږي، څو د افغانستان د ښځو د عدالت غوښتنې غږ چوپ کړي.