طالبانو په کندهار کې د ښځو د جامو ګنډونکي د کار کولو منعه کړي دي
- Zan News
- Sep 22
- 1 min read
سیمهییزې سرچینې په کندهار کې وایي چې طالبانو په دې ولایت کې د ټولو هغو خیاطانو فعاليتونه بند کړی چې د ښځو جامې یې ګنډلې.
سرچینې د دوشنبې په ورځ (۳۱ وږی) زننیوز ته ویلي، طالبانو له تېرې اونۍ راهیسې دا بندیز په پراخه کچه عملي کړی او د ښځینه جامو ځانګړي دکانونه یې تړلي دي.
یوه سیمهییزه سرچینه چې نه یې غواړي نوم یې خپور شي، وايي چې د طالبانو د امر بالمعروف اداره تېرې اونۍ لږ تر لږه لس خیاطان نیولي وو چې وروسته د ضمانت په بدل کې خوشې شول.
د سرچینې په وینا، د طالبانو دا اقدام په کندهار کې لسګونه کسان له کاره پاتې کړي او د خلکو سخت غبرګون یې راپارولی دی.
په عین وخت کې، نورو سرچینو ویلي د طالبانو د امر بالمعروف اداره ګواښ کړی چې پر ښځو به نورې هم زیاتې محدودیتونه ولګوي.
طالبانو تر اوسه په دې اړه رسمي څرګندونې نه دي کړې.
یاده دې وي چې طالبانو په کندهار کې تازه حکم کړی چې پلورونکي یوازې هغو ښځو ته اجناس وپلوري چې برقه یا چادري پر تن ولري. د دغه فرمان پر بنسټ، هغه ښځې چې یوازې «عادي حجاب» ولري، د بازار او پېرودلو حق نه لري او هغه پلورونکي چې سرغړونه وکړي، له مجازاتو سره به مخ شي. همدارنګه طالبانو پر ښځینه پلورونکو او لاسفروشانو د کار پر مهال د برقه اغوستل اجباري کړي دي.
