طالبانو څلور تنه، په ګډون د دوو ښځو، په بلخ او لغمان کې په دره وهلي دي

Image: AP via independent.co.uk

طالبانو څلور تنه، چې دوه ښځې هم پکې شاملې دي، د «نامشروع اړیکو» او «له کوره تښتېدلو» په تور د بلخ او لغمان په ولایتونو کې د خلکو په وړاندې په دره وهلي دي.

د طالبانو سترې محکمې د چهارشنبې په ورځ (۱۹ وږی) په جلا خبرپاڼو کې اعلان کړی چې په بلخ ولایت کې یوه ښځه او یو سړی هر یو په یو کال بند او ۳۹ درو محکوم شوي دي. په لغمان ولایت کې هم یوه ښځه او یو بل سړی په اوو کلونو بند او ۳۹ درو محکوم شوي دي.

دغه سزاوې د طالبانو د مسوولینو، د سیمه‌ییزو محکمو د قاضیانو او د خلکو د یوې ډلې په حضور کې عملي شوې دي. طالبانو دغه اقدام د «حدودو او د شریعت د احکامو پلي کول» بللي دي.

دا په داسې حال کې ده چې ریچارد بنت، د ملګرو ملتونو د بشري حقونو شورا ځانګړي راپور ورکوونکي د افغانستان لپاره، تازه ویلي چې یوازې د روان میلادي کال له پیل راهیسې طالبانو له ۶۰۰ ډېر کسان په دره وهلي او زندان ته یې محکوم کړي دي.

سره له دې چې د طالبانو له واکمنۍ څلور کاله تېر شوي او نړیواله ټولنه یې پراخ غندلي، د صحرایي محکمو او بدني سزاوو لړۍ لا هم روانه ده. د بشري حقونو فعالان وایي په عام محضر کې په دره وهل د انساني کرامت ښکاره نقض دی او نړیواله ټولنه باید د دې تاوتریخوالي پر وړاندې چوپ پاتې نه شي.