عفو بينالملل: طالبان بايد د مهدي انصاري پر ضد له خپل شرموونکي کمپاين څخه لاس واخلي
- Zan News
- Oct 5
- 2 min read
د عفو بينالملل سازمان د طالبانو له لوري د مهدي انصاري د «جبري اعتراف» ويډيو خپرېدو ته په غبرګون کې د دغه خبريال د بېقيد او شرط سمدستي خوشې کېدو غوښتنه کړې ده.
دغه سازمان د شنبې په ماښام (۱۲ تله) په يوې اعلاميې کې له طالبانو غوښتي چې «د بدنامۍ له شرموونکي کمپاين» څخه لاس واخلي.
عفو بينالملل په دې اعلاميه کې ټينګار کړی چې د طالبانو قضايي نظام د منتقدانو د ځپلو وسيله ګرځېدلی او هر هغه څوک چې د دې ډلې له تګلارو سره مخالفت څرګند کړي، د خپلسريو نيونو، غيرقانوني بند، جبري تښتونو او جبري اعترافونو له خطر سره مخ کېږي. دغه بنسټ خبرداری ورکړی چې طالبان له دغو کړنلارو څخه د خبريالانو، مدني فعالانو او د بشري حقونو د مدافعانو د غلي کولو لپاره کار اخلي.
د عفو بينالملل په وينا، طالبانو مهدي انصاري په يوه «نمايشي او ناعادلانه محکمې» کې يوازې د خبريالۍ د دندې د ترسره کولو له امله د ۱۸ مياشتو بند په سزا محکوم کړی دی. دغه سازمان ټينګار کړی چې هېڅ خبريال بايد د خپل مسلکي کار له امله زنداني نه شي، او طالبانو ته سپارښتنه کړې چې تر خوشې کېدو پورې بايد ډاډمن کړي چې نوموړی د نړيوالو معيارونو مطابق ساتل کېږي او د روغتيايي خدمتونو، وکيل مدافع او د خپلې کورنۍ له ملاقاتونو برخمن وي.
مهدي انصاري، د «آژانس افغان» خبريال، د ۱۴ تله ۱۴۰۳ لمريز کال د طالبانو د استخباراتو له لوري د کابل د دشتبرچي له سيمې نيول شوی او له هغه وخت راهيسې په زندان کې ساتل کېږي. طالبانو هغه د «د نظام پر ضد تبليغاتو» په تور يو نيم کال بند ته محکوم کړی دی.
دوه ورځې وړاندې، له طالبانو سره تړلي يو رسنيز بنسټ د هغه د «جبري اعتراف» ويډيو خپره کړه چې پکې انصاري د فشار او نامعلومو شرايطو لاندې د خپلې خبريالۍ له کاره د پښېمانۍ څرګندونه کوي.
له دې وړاندې، د افغانستان د خبريالانو مرکز هم د دغې ويډيو خپرول «د عادلانه محاکمې له اصولو ښکاره سرغړونه» بللې او دا يې د «د رسنيو د پراخې سرکوبګرۍ د بهير يوه برخه» ګڼلې ده. دغه مرکز ويلي چې طالبان د خپلسريو نيونو او ناعادلانه محاکمو له لارې د بيان او رسنيو ازادي په منظم ډول له منځه وړي.
اوس مهال د راپورونو له مخې لږ تر لږه شپږ خبريالان د طالبانو په زندانونو کې په کابل، غزني او پروان ولايتونو کې بنديان دي. له هغه وخته چې طالبان يو ځل بيا واک ته رسېدلي، د رسنيو ځپل او د جبري اعترافونو خپرول د دې ډلې د عامه افکارو د کنټرول يو له اساسي وسايلو څخه ګرځېدلي دي. د مهدي انصاري وروستۍ ويډيو د همدې سرکوبګرې تګلارې تازه بېلګه ده.
