غلو په لوګر کې یوه مور او لور وژلي دي
- Zan News
- Nov 9
- 1 min read
د طالبانو امنيتي چارواکي وايي، په لوګر ولايت کې يوه مور او لور د غلو لهخوا وژل شوي دي.
د طالبانو د امنيې قوماندانۍ د شنبې په ورځ (۱۷ لړم) په يوې خبرپاڼه کې ويلي، دا پېښه د دغه ولايت په مرکز پلعلم ښار کې رامنځته شوې ده.
د خبرپاڼې له مخې، غلو دغه ۶۰ کلنه ښځه او د هغې ۱۳ کلنه لور تر بېهوشه کولو وروسته په تبر وهلې او وژلې دي، او بيا يې مړي په صندوق کې اېښې دي.
قوماندانۍ زياته کړې چې د دې پېښې په تړاو دوه کسان د عمرآباد له سيمې نيول شوي دي.
د طالبانو په وينا، له قربانيانو نژدې څلور زره امريکايي ډالره او ۲۰۰ زره افغانۍ غلا شوې دي.
دا پېښه په داسې حال کې شوې، چې طالبان څو ځل د «هېواد د عمومي امنيت» د ټينګښت دعوه کړې، خو راپورونه ښيي چې د غلا، وژنې او تښتونې پېښې په وروستيو مياشتو کې زياتې شوې دي.
خلک په بېلابېلو ولايتونو کې وايي، طالبان د امنيت په ټينګښت او د جرمونو په مخنيوي کې پاتې راغلي دي.
