لغمان: یو سړي خپله مېرمن د وهل ټکولو وروسته په ډزو ووژله

Social Media

سیمه‌ییز سرچینې په لغمان ولایت کې وایي چې یوه سړي په مهترلام ښار، د دغه ولایت په مرکز کې، خپله مېرمن په ډزو وژلې ده.

دا پېښه د جمعې شپه (۲۸ وږی) د «میدانیو» په سیمه کې رامنځته شوې ده. سیمه‌ییزو سرچینو ویلي، یاد سړي لومړی خپله مېرمن سخت وهلې ټکولې او وروسته یې په کلاشنکوف ډزې پرې کړې او وژلې یې ده.

د سرچینو په وینا، دغه سړی په نشه‌يي توکو روږدی و او له قتل وروسته له ساحې تښتېدلی دی.

د طالبانو سیمه‌ییزو مسئولانو د دې وژنې تایید کړی او ویلي یې دي چې په دې تړاو څېړنې روانې دي.

دا په داسې حال کې ده چې له ۲۰۲۱ د اګست د طالبانو د بیا واکمنېدو وروسته، د ښځو وژنې او پر هغوی کورني تاوتریخوالی په افغانستان کې په څرګند ډول زیات شوی دی. د ملاتړ کوونکو بنسټونو له منځه تګ، د ښځو پر وړاندې سخت محدودیتونه او د اقتصادي او ټولنیزو فشارونو زیاتوالی د دې پدیدې د پراخېدو له عمده لاملونو بلل کېږي.