مدني بنسټونه: طالبانو په پنجشیر کې هدفي وژنې، جبري کډوالي او تري تم کول ترسره کړي دي
- Zan News
- Sep 7
- 2 min read
د طالبانو د پنجشیر د نيولو د څلورم تلین په مناسبت، مدني او بشري حقونو بنسټونو د راپورونو په خپرولو سره د دې ولايت د بشري حقونو د نقض د زياتېدو په اړه اندېښنه څرګنده کړې ده.
د پنجشیریانو نړیوال شورا په يو راپور کې ويلي چې طالبانو په تېرو څلورو کلونو کې په پنجشیر کې هدفي وژنې، صحرايي محاکمې، شکنجې، خپلسري نیونې او جبري تري تم کول ترسره کړي دي. دغه شورا زياته کړې چې طالبانو سلګونه کورنۍ جبري کډوالۍ ته اړې کړې او د خلکو شتمنۍ د دې ډلې د جنګیالیو او يا د هغوی د خپلوانو له خوا غصب شوې دي.
د دې شورا په وينا، طالبانو د مکتبونو په تړلو، د فرهنګي مرکزونو په سوځولو او د ځينو تعليمي مرکزونو په پوځي اډو په بدلولو سره د پنجشیر د خلکو پر ټولنيز او فرهنګي ژوند سخت زيان اړولی دی. دغه شورا له ملګرو ملتونو او نړيوالو بنسټونو غوښتي چې د دې نقض عاملين د نړيوالو محاکمو پر وړاندې ودرول شي.
بل لور ته، د پنجشیر د ښځو خوځښت په يو راپور کې ويلي چې طالبانو د دې ولايت ۱۸ تنه اوسېدونکي تري تم کړي او د هغوی نوملړ یې خپور کړی دی. د راپور له مخې، د ۱۰ تنو هویت مستند شوی چې پنځه تنه يې پوځي سابقه او يا د مقاومت جبهې سره تړاو لرلی، خو پاتې ۱۲ تنه ملکي وګړي وو.
دغه خوځښت ټينګار کړی چې طالبان په سیستماتیک ډول د فراقانوني وژنو، شکنجو او جبري تري تم کولو لاس پورې کوي او له نړيوالو بنسټونو، په ځانګړي ډول د ملګرو ملتونو د تري تم شویو د کمېسيون، غوښتنه کړې چې موضوع ژر تر ژره تعقيب کړي. همدارنګه يې پر حقيقت موندنه، د اسنادو ثبت او له قربانيانو د کورنيو رواني، حقوقي او رسنيز ملاتړ اړين بللی دی.
دغه راپورونه په داسې حال کې خپرېږي چې په تېرو څلورو کلونو کې طالبانو د پنجشیر ګڼ اوسېدونکي نه يوازې په همدې ولايت، بلکې په کابل او نورو ولايتونو کې هم نيولي، زنداني کړي او په ځينو مواردو کې يې وژلي دي.
