ملګرو ملتونو: د افغانستان د شمال خلک له زلزلې وړاندې هم له فقر سره مخ وو

Photo: AP Photo/Sirat Noor

ملګرو ملتونو ويلي، د افغانستان د شمال ولايتونو اوسېدونکي حتی له وروستۍ زلزلې وړاندې هم له اوږدمهاله فقر، وچکالۍ او د بنسټيزو خدماتو له کمښت سره مخ وو.

د ملګرو ملتونو د وياند مرستيال فراحان حق د دې ادارې په تازه خبري ناسته کې ويلي:

«حتی له دې زلزلې وړاندې، د دې سيمې خلک د له دوو ميليونو زياتو بېرته راستانه شويو مهاجرو له راتګ وروسته، له وچکالۍ، اوږدمهاله فقر او د لومړنيو خدماتو له کمښت سره مخامخ وو.»

هغه زياته کړې چې ملګري ملتونه د مرستندويه ادارو په همغږۍ د زلزلې د زيانونو ارزونه کوي او د بېړنيو مرستو د رسولو پر چارو کار روان دی.

د نوموړي په وينا، د لومړنيو راپورونو له مخې، د دوشنبې د سهار (۱۲ لړم) زلزلې په پايله کې لږ تر لږه ۲۰ تنه مړه او له ۹۰۰ زيات نور ټپيان شوي دي.

حق ټينګار کړی چې د افغانستان بشري بحران لا هم ژور روان دی او د ملګرو ملتونو بشردوستانه پروګرامونه له جدي مالي کمښت سره مخ دي. ده ويلي: «له ټولې غوښتل شوې ۲.۴ ميليارده ډالره بوديجې څخه يوازې يوه برخه تأمين شوې، او له ۱.۵ ميليارده ډالرو زيات کسر لا هم شته.»