نړیوال د خوراک پروګرام: د افغانستان وروستيو زلزلو د لوږې بحران زیاته کړی دی

Photo: Str/Xinhua

نړیوال د خوراک پروګرام (WFP) وايي چې د افغانستان وروستيو زلزلو د لوږې او خوارځواکۍ بحران بې‌ساري کچې ته رسولی دی.

دغه بنسټ نن پنجشنبه (۱۰ تله) په يوه راپور کې ويلي چې له ۹ ميليونو زيات خلک، د ميليونو ښځو او ماشومانو په ګډون، له شدیده خوړو ناامنۍ سره مخ دي او د ماشومانو او ميندو سختې خوارځواکۍ د «تر ټولو لوړې ثبت شوې کچې» ته رسېدلې ده.

د راپور پر بنسټ، ختيځ ولايتونه په ځانګړي ډول کونړ او ننګرهار چې تر ټولو زيات له زلزلې ځپلي دي، له وړاندې هم د خوارځواکۍ له بحراني کچو سره مخامخ وو او اوس حالت لا خراب شوی دی. يوازې په درې ولايتونو (کونړ، ننګرهار او لغمان) کې تر اوسه ۵۸ زره کسانو ته د بېړنۍ خوراکي مرستې رسېدلې ده، خو د غرونو او ليرې پرتو سيمو اوسېدونکي لا هم د ويجاړو سړکونو او د لاسرسي نشتوالي له امله له مرستو بې‌برخې پاتې دي.

دغه سازمان ويلي چې په همدې وخت کې د زرګونو کورنيو له پاکستانه جبري ستنېدل د محدودو بشردوستانه سرچينو پر وړاندې اضافي فشار راوړی دی.

نړیوال د خوراک پروګرام وايي چې د بوديجې د کمښت له امله د مياشتنۍ خوراکي مرستې کچه له څو ميليونو کسانو څخه کم تر يو ميليون ته راټيټه شوې ده. دغه بنسټ د راتلونکو شپږو مياشتو لپاره ۶۲۲ ميليونه ډالره غوښتنه کړې ده.

جان آیلف، په افغانستان کې د WFP مشر، ټينګار کړی:

«د زلزلې ژوندي پاتې شوي بايد د ژمي په سړه هوا کې د دوهمې مرګ‌وجې قربانيان نه شي. پرته له بېړنۍ مرستې، لوږه او خوارځواکۍ د ميليونو افغانانو ژوند له ګواښ سره مخ کوي.»