هريت هرمن: د افغانستان مېرمنې نه دي تسليم شوې او برېتانيا د هغوی تر څنګ ولاړه ده

Photo: HarrietHarman/X

د برېتانيا د مېرمنو او نجونو لپاره ځانګړې استازې هريت هرمن ويلي، د طالبانو د سرکوب او محدوديتونو سره سره د افغانستان مېرمنې نه دي تسليم شوې او برېتانيا هم د هغوی د حقونو په دفاع کې ټينګه ولاړه ده.

هرمن د چهارشنبې په ورځ (۳۰ تله) په يو پيغام کې، چې د افغان فعاله مېرمنو سره د هغې د پخوانۍ غونډې انځور هم ورسره و، وليکل: «د افغان مېرمنو پيغام روښانه دی؛ هغوی نه دي تسليم شوې، او موږ هم به تسليم نه شو. برېتانيا د هغوی د حقونو په غوښتنه ټينګه ولاړه ده او د هغوی غږ پياوړی کوي.»

په هغه انځور کې چې هغې خپور کړی، يو شمېر افغان فعاله مېرمنې د هرمن او د افغانستان لپاره د برېتانيا له ځانګړي استازي ريچارد ليندزي سره يو ځای ليدل کېږي.

له دې وړاندې، ريچارد ليندزي د اکتوبر په لسمه نېټه همدا انځور خپور کړی و او دا ناسته يې «يو سازنده او مهم بحث» بللې وه. هغه ويلي و چې د افغان مېرمنو مشرانو خپل نظرونه د مېرمنو د حقونو، رهبرۍ او د هغوی د ونډې د ملاتړ په اړه شريک کړل.

دا څرګندونې په داسې حال کې شوې دي چې د افغانستان مېرمنې لا هم د طالبانو تر واک لاندې له زده‌کړې، کار او ټولنيز حضور څخه محرومې دي. د نړيوالې ټولنې له پرله‌پسې غوښتنو سره سره، طالبانو تر اوسه د مېرمنو د بنسټيزو حقونو د بېرته راګرځولو په برخه کې هېڅ ګام نه دی اخيستی.