هلمند: يو سړي خپله مور او دوه خوېندې په ډزو وژلې دي

Social Media

سيمه‌ييزې سرچينې په هلمند ولايت کې وايي چې يو سړي د نهرسراج په ولسوالۍ کې خپله مور او دوه خوېندې په ډزو وژلي او خپل پلار يې ټپي کړی دی.

ياد پېښه د سه‌شنبې په ورځ (۸ تله) د «شين‌باغ» په کلي کې رامنځته شوې ده.

د سرچينو په وينا، دغه سړي لومړی له خپل پلار سره لفظي شخړه کړې او وروسته يې په ډزو هغه او د کورنۍ نور غړي په نښه کړي دي.

سرچينې زياتوي چې دا کس د خپلې کورنۍ د غړو د وژنې په تور د طالبانو له لوري نيول شوی، خو د دې ډلې سيمه‌ييزو مسوولانو تر اوسه په اړه څه نه دي ويلي.

د کورنۍ دننه د وژنو پېښې له هغه وخت راهيسې زياتې شوې دي چې طالبان يو ځل بيا په افغانستان واکمن شوي دي. په ډېرو دغو مواردو کې قربانيان ښځې او نجونې دي چې د کورني تاوتريخوالي تر سيورې لاندې خپل ژوند له لاسه ورکوي.