پرون له ایرانه او پاکستانه تر زر ډېرو افغان کورنیو هېواد ته ستنېدلي دي

Photo: Marjan Wafa / IOM

د طالبانو تر کنترول لاندې رسنیو راپور ورکړی چې یوازې د تېرې ورځې په ترڅ کې ۱۱۶۸ افغان کورنۍ له ایران او پاکستانه بېرته افغانستان ته ستنېدلي دي.

د باختر خبري آژانس د چهارشنبې په ورځ (د وږي پنځمه) لیکلي چې ۵۷۴ کورنۍ د ننګرهار د تورخم له لارې، ۵۱ کورنۍ د کندهار د سپین بولدک له لارې، ۱۰۸ کورنۍ د نیمروز د پل ابریشم له لارې، درې کورنۍ د پکتیکا د انګور اده له لارې او ۴۳۲ کورنۍ د هرات د اسلام‌قلعه له لارې هېواد ته داخل شوي دي.

یاده دې وي چې د افغان مهاجرو د شړلو لړۍ له ایران او پاکستانه لا هم روانه ده او په وروستیو ورځو کې نوره هم شدیده شوې ده.