په ایران کې د افغان ښځو پر وړاندې تاوتریخوالی زیات شوی؛ یوه مور له خپلو درېو ماشومانو سره په تهران کې وژل شوې ده
- Zan News
- Jul 27
- 1 min read
د بشري حقونو سازمان «ههنگاو» راپور ورکړی چې یوه ۲۵ کلنه افغانه ښځه له خپلو درېو وړو ماشومانو سره په تهران کې وژل شوې ده.
دغه سازمان د شنبې په ورځ (د زمري ۴مه) اعلان کړی چې دا پېښه شاوخوا لس ورځې وړاندې د تهران په مرتضیگرد سیمه کې رامنځته شوې ده.
د ههنگاو د راپور له مخې، یاده ځوانه ښځه د چړو په ګوزارونو وژل شوې او درې واړه ماشومان یې خفه کړل شوي دي. ویل کېږي د دې ماشومانو عمرونه د دوو او پنځو کلونو ترمنځ وو.
د دې ښځې جسد د جمعې په ورځ، لس ورځې وروسته له پېښې، هغه مهال وموندل شو چې د سیمې اوسېدونکو له پولیسو سره اړیکه ونیوله.
ههنگاو زیاته کړې چې دغه ښځه د یوه افغان سړي دویمه مېرمن وه چې تازه افغانستان ته ستنی شوی و، او دا ښځه له خپلو ماشومانو سره یوازې په یوه کرايي کور کې اوسېده.
په وروستیو میاشتو کې په ایران کې د افغان مهاجرو ښځو پر وړاندې د تاوتریخوالي د زیاتېدو په اړه اندېښنې ډېرې شوې دي. تر دې وړاندې هم د کبرا رضایي په نوم د یوې افغانې نجلۍ ټوټه شوې مړی په تهران کې موندل شوی و؛ یوه پېښه چې پراخ غبرګونونه یې راپارولي وو.
