په خوست کې د ۱۵ کلن هلک ځان وژنه

سیمه‌ییزې سرچینې په خوست ولایت کې وايي چې د دې ولایت د تڼيو ولسوالۍ د ښوونځي یو زده کوونکي ځان وژنه کړې ده.

دغه پېښه د چهارشنبې په ورځ (د وږي پنځمه) د تڼيو ولسوالۍ د «روشاني» په کلي کې د غرمې پر مهال رامنځته شوې ده.

د سرچینو په وینا، دا ځوان «کوثر» نومېده او شاوخوا ۱۵ کلن و.

د ده د ځان وژنې لامل تر اوسه روښانه شوی نه دی.

په وروستیو میاشتو کې په خوست ولایت کې د ځوانانو او تنکیو ځوانانو د ځان وژنې څو پېښې راپور شوي دي.

دا په داسې حال کې ده چې له طالبانو د بېرته واک ته رسېدو وروسته، د ځان وژنې او مرموزو وژنو پېښې د هېواد په ګڼو ولایتونو کې زیاتې شوې دي.