په میدان وردګو کې د نه چاودلي هاوان د مرمۍ د چاودنې له امله یو ماشوم وژل شوی دی

Social Media

د میدان وردګو ولایت د چک په ولسوالۍ کې د نه چاودلي هاوان د مرمۍ د چاودنې په پایله کې یو ماشوم وژل شوی او څلور نور ماشومان ټپیان شوي دي.

دغه پېښه د شنبې په ورځ (د وږي لومړۍ نېټه) د کوز خوات په کلي کې رامنځته شوې ده.

د طالبانو د طبیعي پېښو د مبارزې اداره وايي، چاودنه هغه مهال شوې چې ماشومان له مکتب وروسته د کور پر لور روان وو.

په همدې حال کې، روغتیايي سرچینو تایید کړې چې ټپیان درملنیزو مرکزونو ته انتقال شوي او د ځینو حالت نازک دی.

یاده دې وي چې افغانستان لا هم د ماینونو او د نه چاودلو مهماتو له امله د نړۍ له تر ټولو زیانمنو هېوادونو څخه دی. د سره صلیب د نړیوالې کمېټې د شمېرو له مخې، یوازې په ۲۰۲۴ کال کې لږ تر لږه ۵۶۴ تنه د دغو موادو د چاودنو له امله وژل شوي چې ۴۳۴ تنه یې ماشومان وو.