په نورستان کې یوه سړي د خپلې مېرمنې مور او پلار په ډزو وژلي دي

Social Media

سیمه‌ییزې سرچینې په نورستان کې وايي چې د دې ولایت د دوآب ولسوالۍ په «شرودمي کلي» کې یوه سړي د خپلې مېرمنې مور او پلار په ډزو وژلي دي.

دغه پېښه د دوشنبې په ماښام (د وږي درېیمه) هغه مهال رامنځته شوه، کله چې د دغه سړي مېرمن د کورنیو اختلافاتو له امله د خپل مور او پلار کور ته تللې وه او کورنۍ یې هغې ته اجازه نه ورکوله چې بېرته د مېړه کور ته ستنه شي.

د سرچینو په وینا، د زوم او د مېرمنې د کورنۍ ترمنځ د شخړې وروسته، نوموړي سړي د خپلې مېرمنې مور او پلار وژلي دي.

د دې پېښې اصلي لامل کورني اختلافات ښودل شوي دي. د طالبانو سیمه‌ییزو چارواکو په نورستان کې تر اوسه په دې اړه څه نه دي ویلي.

یاده دې وي چې په وروستیو کې ورته د کورنیو وژنو پېښې د افغانستان په بېلابېلو سیمو کې راپور شوې دي.