په هرات کې د طالبانو له خوا د یوې ښځینه بلاګرې نیول

Social Media

محلي سرچینې په هرات کې وایي چې عالیه ملورین، یوه پېژندل شوې بلاګره، د پنج‌شنبې په ورځ (۳ تله) د «برج صدف» په رستورانت کې د ډوډۍ خوړلو پر مهال د طالبانو د امر بالمعروف د مامورینو له خوا ونیول شوه.

د سرچینو په وینا، د طالبانو مامورینو د دې ښځینه بلاګرې د نیولو پر مهال هغې ته سخت ډ وهلې او وروسته یې د هرات مرکزي زندان ته انتقال کړې ده. د هغې کورنۍ د عالیه ملورین د برخلیک په اړه سخته اندېښنه څرګنده کړې ده.

عالیه ملورین له هغه وروسته چې طالبانو د ښځو کار کول منع کړل، خپل فعالیتونه په ټولنیزو شبکو کې پیل کړي وو. هغې د دوکانونو، رستورانتونو، کلینیکونو او نورو کاروبارونو په اعلانونو سره د عاید سرچینه پیدا کړې وه. نوموړې په انسټاګرام کې له ۶۰ زره زیات تعقیبونکي لرل او خپل لاسي محصولات یې هم پلورل.

سرچینې وایي چې دا لومړی ځل نه دی چې نوموړې نیول کېږي. تر دې وړاندې هم طالبانو هغې ته د امر بالمعروف ریاست ته د حاضرېدو بلنه ورکړې وه او ترې یې تعهد اخیستی و چې د بلاګري له فعالیتونو لاس واخلي، خو نوموړې خپلو فعالیتونو ته دوام ورکړی و.

طالبانو په هرات کې تر اوسه د دې ښځینه بلاګرې د نیولو په اړه څه نه دي ویلي.

دا په داسې حال کې ده چې په وروستیو میاشتو کې بهرني بلاګران، په ځانګړي ډول ښځې، افغانستان ته د سفر په حال کې ډېر شوي دي. د هغوی د طالبانو د چارواکو تر څنګ د شتون ویډیوګانې خبر جوړوونکې شوې، خو په مقابل کې، ځایي ښځې لکه عالیه ملورین له سختو چلندونو او نیونو سره مخ کېږي.

فعاله کسان وایي دا اقدام د طالبانو له خوا پر هغو ښځو تازه فشارونه ښيي چې په ټولنیزو شبکو کې فعالیت کوي.