په پاکستان کې د ښوونځي د چت نړېدل؛ ۳۵ کسان مړه شول
د پاکستان په پېښور ښار کې د یوه خصوصي ښوونځي د چت د نړېدو له امله لږ تر لږه ۳۴ زدهکوونکي او یوه ښځینه ښوونکې مړه شوي او تر ۵۰ ډېر نور ټپیان شوي دي.
د پاکستاني رسنیو د راپورونو له مخې، دا پېښه د پنجشنبې په سهار د (تلې په ۲۳مه) د پېښور د دیر کالونۍ په سیمه کې د «الخیر» په نوم ښوونځي کې شوې ده.
د ژغورنې د مسؤلانو په وینا، لومړی د ښوونځي د پورتني پوړ چت نړېدلی او وروسته د لاندې پوړ چت هم پر زدهکوونکو راپرېوتی دی.
ویل شوي چې ډېری قربانیان تر ۱۳ کلونو کم عمره ماشومان دي.
ژغورونکو ځواکونو له څو ساعتونو عملیاتو وروسته تر کنډوالو لاندې بند پاتې کسان راایستلي دي. د یو شمېر ټپیانو روغتیایي وضعیت نازک بلل شوی دی.
په همدې حال کې، د پېښور پولیسو ویلي چې د ښوونځي مالک نیول شوی او د پېښې د علت په اړه پلټنې پیل شوې دي.
د پاکستان لومړي وزیر شهباز شریف د قربانیانو له کورنیو سره خواخوږي څرګنده کړې او د ټپیانو د سمدستي درملنې غوښتنه یې کړې ده.
