په کونړ کې د کور د چت نړېدو د دوو ماشومانو ژوند واخیست

د طالبانو محلي مسئولین په کونړ ولایت کې وایي چې د باران او طوفان له امله د یوه کور چت په منور ولسوالۍ کې نړېدلی چې په پایله کې یې دوه ماشومان وژل شوي او څلور تنه نور، په شمول د دوو ښځو ټپیان شوي دي.

ضیاءالرحمان سپین‌غر، د طالبانو د اطلاعاتو او فرهنګ ریاست د اطلاعاتو آمر په کونړ کې، ویلي چې دا پېښه نن پنج‌شنبه (۳ تله) د غرمي مخکې د منور ولسوالۍ د چنار په کلي کې رامنځته شوې ده.

د هغه په وینا، ټول قربانیان د یوې کورنۍ غړي دي او ټپیان روغتون ته لېږدول شوي دي.

سپین‌غر د دې پېښې د دقیق علت په اړه څه نه دي ویلي، خو معمولاً دا ډول پېښې د کليوالو د خټو د کورونو د زړوالي له امله رامنځته کېږي.

تر دې وړاندې هم په یو شمېر ولایتونو کې د دیوالونو او چتونو د رالوېدو له امله چې د باران او طوفان پایله وه، د یو شمېر کسانو ژوند له لاسه وتلی دی. د افغانستان په کليوالو او لیرې پرتو سیمو کې کورونه زیاتره په غیرمعیاري ډول له خټو جوړ شوي چې د واورې او باران له امله زړېږي او رالوېږي.