څلور ښځينه بلاګرې د طالبانو له لوري په هرات کې نيول شوې دي

Social media

سيمه‌ييزې سرچينې په هرات کې وايي چې د طالبانو د امر بالمعروف او نهي عن المنکر اداره پرون (۵ اکتبر) څلور ښځينه بلاګرې د نامعلومو دلايلو له امله نيولي دي.

يادې نجونې چې په ټولنيزو شبکو کې يې فرهنګي، هنري او ټولنيز محتوا خپروله، له دې وړاندې وروسته له هغه چې طالبانو ورته پرله‌پسې اخطارونه ورکړي او نورې ښځينه بلاګرې يې نيولې وې، د خپلو پاڼو ټول محتوا يې حذف کړی و.

سره له دې چې دغو بلاګرو د خپل امنيت د خوندي ساتلو لپاره د ټولنيزو شبکو له فعاليتونو لاس اخيستی و، خو بيا هم د طالبانو د ځواکونو د نيونې او چلند هدف ګرځېدلې دي.

د بشري حقونو فعالان او د ټولنيزو شبکو کاروونکي دا د طالبانو له لوري يو منظم اقدام بولي چې موخه يې د ښځو د غږ غلی کول او له عامه فضا څخه د هغوی بشپړه ورکېدل دي.