یونیسف: د افغانستان تعلیمي نظام بحراني پړاو ته رسېدلی دی

Image source: UNICEF Afghanistan / X

د ملګرو ملتونو د ماشومانو د ملاتړ صندوق یونیسف خبرداری ورکړی چې د افغانستان تعلیمي نظام بحراني پړاو ته رسېدلی دی.

یونیسف د سې‌شنبې په ورځ (۷ سلواغه) په یوه پیغام کې ویلي چې په افغانستان کې له ۹۰ سلنې ډېر ۱۰ کلن ماشومان د ساده متن د لوستلو توان نه لري.

د دې ادارې په وینا، دغه شمېرې په افغانستان کې د «ښوونځي ته تګ پرته له زده کړې» د بحران ښکارندويي کوي.

یونیسف ټینګار کړی چې په بنسټیزو زده کړو، سواد او د حساب مهارتونو کې دوامدارې پانګونې د هر ماشوم د بریا د تضمین لپاره اړینې دي.

تر دې مخکې، یونیسف او یونسکو اعلان کړی و چې په افغانستان کې ۲.۲ میلیونه ځوانې نجونې د طالبانو له لوري د لګېدلو محدودیتونو له امله له ښوونځي پاتې شوې دي.