یونیسف: د افغانستان راتلونکی د نجونو پر زدهکړه تړلی دی
- Zan News
- Sep 23
- 1 min read
د ملګرو ملتونو د ماشومانو صندوق (یونیسف) یو ځل بیا په افغانستان کې د نجونو د زدهکړې د بندیز د پای ته رسېدو غوښتنه کړې ده.
یونیسف د سهشنبې په ورځ (د تله ۱مه) د دغه بنسټ د ماشومانو د ساتنې د رییسې شیما سن ګوپتا له قوله په ایکس ټولنیزه شبکه کې په یوه پیغام کې ویلي: «د افغانستان راتلونکی د نجونو پر زدهکړه تړلی دی.»
ګوپتا په دې پیغام کې ټینګار کړی: «څلور کاله کېږي چې د افغانستان نجونې له زدهکړې بېبرخې دي. هغوی له خپلو هیلو او ژوند څخه محرومې شوې دي. زدهکړه یوازې زدهکول نه دي، زدهکړه ساتنه ده؛ نجونې د ماشوموالي له ودونو، رواني ستونزو او د محرومیت له دایمي باره ساتي.»
هغې زیاته کړې: «یونیسف باور لري هر ماشوم د زدهکړې مستحق دی. موږ له طالبانو غواړو چې د ښوونځیو دروازې پرانیزي او پرېږدي چې نجونې زدهکړه وکړي؛ ځکه د افغانستان راتلونکی د نجونو پر زدهکړه تړلی دی.»
یادونه ده چې طالبانو د افغانستان د بیا ځلي نیولو راهیسې تر اوسه د شپږم ټولګي څخه پورته د نجونو زدهکړه بنده کړې ده؛ داسې اقدام چې له امله یې له یو نیم میلیونو زیاتې نجونې له ښوونځي بېبرخې شوې دي.
