یونیسف: زموږ ټیمونه د زلزلهځپلو سيمو کې د ماشومانو او کورنيو د ملاتړ لپاره حضور لري
- Zan News
- Nov 3
- 1 min read
د ملګرو ملتونو د ماشومانو د ملاتړ صندوق (یونیسف) استازي په افغانستان کې ويلي، د دې ادارې د مرستو ټیمونه د هېواد په شمال کې د زلزلهځپلو سيمو ته رسېدلي دي، څو له ماشومانو او اغېزمنو کورنيو سره مرسته وکړي.
تاجالدين اويوالي، د يونيسف استازي، د دوشنبې په ورځ (۱۲ لړم) په يو پيغام کې چې په ټولنيز شبکه «ايکس» کې خپور شوی، د قربانيانو له کورنيو سره د خواخوږۍ څرګندونه کړې ده. هغه ليکلي دي: «موږ د افغانستان د شمال د وروستۍ زلزلې د قربانيانو په غم کې شريک يو او له اغېزمنو کورنيو او ټولنو سره خواخوږي لرو.»
هغه زياته کړې چې يونيسف د خپلو همکارو نړيوالو ادارو سره په ګډه هڅه کوي، څو د ماشومانو او کورنيو بېړنۍ اړتياوې پوره کړي.
دا په داسې حال کې ده چې د ۶.۳ ريښتر په کچه زلزلې د تېرې شپې په مهال د افغانستان شمالي ولايتونه ولړزول، چې له امله يې درانه تلفات او مالي زيانونه رامنځته شوي دي.
د طالبانو د روغتيا وزارت ويلي چې تر اوسه له ۲۰ زيات کسان د بلخ او سمنګان په ولايتونو کې مړه شوي او ۵۳۴ نور ټپيان دي. د دې وزارت په وينا، دا لومړني شمېرې دي او امکان لري د قربانيانو شمېر نور هم زيات شي.
