یوه ځوانه ښځه په ننګرهار کې ځانوژنه کړې ده
- Zan News
- Jul 26
- 1 min read
محلي سرچینو په ننګرهار ولایت کې راپور ورکړی چې یوه ځوانه ښځه د دې ولایت په غنيخېل ولسوالۍ کې د ټوپک په ډز ځانوژنه کړې ده.
د راپورونو له مخې، دا پېښه د جمعې په ورځ (د زمري درېیمه نېټه) د غنيخېل ولسوالۍ په اړوند سیمه کې رامنځته شوې ده.
یوه محلي سرچینه وايي، دا ښځه شاوخوا اته میاشتې مخکې واده شوې وه او د خپل مېړه له وسلې څخه په استفادې یې خپل ژوند پای ته رسولی دی.
د دې ځانوژنې علت «کورنی تاوتریخوالی» بلل شوی دی.
د دې ښځې د هویت او عمر په اړه جزئیات نه دي ورکړل شوي.
په ننګرهار کې د طالبانو محلي چارواکو تر اوسه په دې اړه څه نه دي ویلي.
دا په داسې حال کې ده چې له هغې راهیسې چې طالبان بېرته واک ته رسېدلي، د هېواد په یو شمېر ولایتونو کې د ښځو او نجونو د ځانوژنې پېښې بېسارې زیاتې شوې دي. ډېری دا پېښې د کورني تاوتریخوالي، شدید فقر او د ښځو پر حقونو او ازادیو سختو محدودیتونو له امله رامنځته کېږي.
