یوه ښځه د طالبانو په محکمه کې ووژل شوه
- Zan News
- Sep 27
- 1 min read
محلي سرچینې په هرات کې وایي چې یوه ښځه نن شنبه (۵ تله) د طالبانو د استیناف په محکمه کې د خپلې قضیې د محاکمې پر مهال په ډزو وژل شوې ده.
دا پېښه د سهار شاوخوا لس بجې د هرات د استیناف په محکمه کې رامنځته شوې ده.
د سرچینو په وینا، دغه ښځه د عبدالرحمان مرادي عليزایي مېرمن وه، چې د هرات د ولایتي شورا پخوانی غړی و او نوموړې د خپل مېړه د وژنې په تور محاکمه کېده. خو د غونډې له پای ته رسېدو وروسته، هغه د محکمې په دهلیز کې په ډزو ووژل شوه.
سرچینې زیاتوي چې د عبدالرحمان مرادي ورور په دې وژنه تورن دی او اوس د طالبانو له لوري تر پوښتنو لاندې دی.
عبدالرحمان مرادي د ۱۴۰۳ کال د مرغومي په ۲۱مه په خپل کور کې په هرات کې وژل شوی و. هغه مهال د ده مړینه «د وسلې د پاکولو پر مهال د مرمۍ د تصادفي ویشتل کېدو» پایله بلل شوې وه، خو مېرمن یې د وژنې په تور نیول شوې وه.
طالبانو په هرات کې تر اوسه په دې اړه څه نه دي ویلي.
